Media personalities angay timan-an ang katungod sa pagsibya ug access to information aduna’y limitasyon

Davao City – Katungod sa mga anaa sa media nga makasibya ug makabaton og impormasyon gikan sa mga ahensya sa gobyerno aron mahatod ang balita sa publiko, apan angay nga timan-an nga kung adunay press freedom ug access to information, dili walaon sa huna-huna nga aduna usab kini limitasyon.

Kini maoy gibutyag ni Department of Interior and Local Government (DILG) XI Regional Director ug kanhing broadcaster Alex Roldan sa interview sa DXDC RMN Davao, subay sa balitang gibasura sa korte ang kasong gipasaka batok sa usa ka reporter nga si Jose Pajares sa Naga City, Camarines Sur, human giingong nangukab og blotter report sa usa ka police station nga wala niagi sa insaktong proseso ug walay pagtugot sa hepe nga giingong nakalapas sa Data Privacy Act of 2012.

“Ang mga reporter dili pwede mangukab og mga dokumento nga wala’y pagtugot sa in-charge ana nga dokumento, wala’y permiso. So, agi’g pagsulod sa maayong pamatasan kinahanglan nga magpahibalo ta kung mangukab tag mga dokumento pananglitan, police blotter. Dili man gud na siya automatic sa public. Kay dili paman ni siya ingon nga final kundili sumbong pa lang ni,” segun ni Roldan.

Dugang ni Roldan, dili makatarunganon ang pagpriso dayon sa maong reporter, apan angay hinumduman nga importanteng mosunod una sa protocol, tungod ang ubang blotter adunay mga confidential reports nga dili pa pwedeng ipagawas ngadto sa publiko.

RadyoMaN Ivy Parido