General Santos City–Gipaklaro ni Glan Municipal Mayor Vivien Yap nga wala na sila nagapangita ug medical certificate sa mga gusto muadto sa munisipyo sa Glan, Sarangani, Province. Ang kinahanglan lang ipakita sa katawhan sa matag checkpoint mao lamang ang DVY Cares QR code nga maoy himoong basehan aron mapadali ang contact tracing higayon nga adunay magpositibo sa covid 19.
Awhag lang sa Mayor ngadto sa mga turista nga gustong maglaag sa mga nindot nga mga beach resort sa Glan kinahanglan nga magpa-booking daan sa resort nga ilang adtoan gumikan dili pasudlon kung walay booking. Samtang gitugyan na lamang sa opisyal ngadto na sa mga tag-iya sa resort ang responsibilidad sa pagpatuman sa health protocols aron maseguro nga malikay sa makamatay nga virus nga covid 19.
Sa pikas bahin gipasalamatan ni Mayor Vivien Yap ang katawhan sa Glan human gituman niini ang iyang hangyo nga sundon gayud ang gi-implementar nga health protocols sa gobyerno tungod sa padayong bahad sa covid 19. Gipasigarbo usab niini human nga ang nakatala lamang ug kaso sa covid 19 sa lungsod ang anaa lang sa poblacion ug wala naka-abot sa ubang mga barangay kini gumikan sa pagpaningkamot sa mga Brgy. Kapitan nga dili masudlan ug virus ang ilang lugar ug ang padayong suporta sa katawhan. Kung kahinumduman nga una ng nadismaya ang Mayor human nga dunay pipila ka mga tawo ang wala misunod sa health protocols sama sa pagsul-ob ug facemask nga naglaag-laag sa pampublikong lugar kung asa niadtong panahona mao usab ang pagtaas sa kaso sa covid 19 sa munisipyo. (RV)
