Davao City – Gikontra sa National Center for Commuter Safety and Protection (NCCSP) ang sugyot ni Cavite Governor Jonvic Remulla nga tugtan na ang mga backriders sa motor basta mag-asawa ug sakop lamang sa pamilya.
Matud ni NCCSP President Elvira Medina, mabutang sa tumang kadelikado ang driver ingon man ang backrider kon tugtan ang sugyot ni Remulla ngadto sa Inter-Agency Task Force on the Management of Emerging Infectious Diseases (IATF-EID).
Base sa datos, usa ang motorsiklo nga involved sa pinakadaghang kaso sa disgrasya diin daghan na usab nga kinabuhi ang nakalas ingon man naangol dili lamang sa Pilipinas apan sa tibuok kalibutan hatud sa kakulang sa proteksiyon.
Gipunto ni Medina nga ang virus pwedeng motapot sa sapatos, sinina ug pantalon sa driver ug sa backrider diin malagmit nga matakdan usab ang ubang ginsakpan sa ilang pamilya.
Dugang gipasabot sa kanhi DoTr Assistant Secretary ang hilabihan nga kakuti sa mga pulis sa mga COVID control points tungod sa mga dokumento nga ilang pangayoon gikan sa mga driver ug backrider.
Hasol na sa mag-asawa kung pakuhaon pa sila og marriage contract isip pagmapatuod sa tinuod nga es-tado sa ilang relasyon karon nga sirado gihapon ang Philippine Statistics Authority (PSA) tungod sa quarantine measures.
Segun ni Medina nga kon ipamugos gayod ni Remulla ang backrider, magpasamot lamang kini sa trapiko gumikan unya sa kataas sa linya sa mga sakyanan ug mga motor diha sa mga quarantine checkpoints.
Busa, gidasig sa kanhi opisyal ang katawhan nga musunod na lamang sa tanang mga talamdang giluwatan sa gobyerno sanglit kaayohan ug kaluwasan lamang maoy gihunahuna ug gihimong prayoridad sa kagamhanan karon.
RadyoMaN Joel Viray
