Davao City- Hangtod karon blangko gihapon ang Buhangin PNP sa motibo kung ngano gibugha sa riding in tandem ang usa ka mekaniko alas 2:45 sa hapon niadtong Sabado.
Mosakay na unta sa motor ang biktima nga si Mark Anthony Lopez Jr., 29 anyos, mekaniko ug nanimuyo sa Orchids St. Buhangin dihang kalit kini gihunongan sa riding in tandem.
Gikan nagpalit og piyesa sa motor sa usa ka tindihan sa Tigatto si Lopez dihang gipusil kini sa angkas sa nakamotorsiklo sa makatulo ka higayon.
Wala mubuto ang .45 ka pistola sa suspek busa nakadagan pa si Lopez.
Apan paspas nakagukod laing mamumuno ug dayon pusil sa makadaghang higayon ngadto sa biktima ug didto na natumba ug nakabsan sa kinabuhi ang mekaniko.
Paspas mikagiyo ang mga suspek palayo sa mao nga lugar nga pareho naka-jacket og itom ug nakahelmet.
Ang Scene of the Crime Operatives nakarekober og upat ka empty shell sa punto 45 nga pistola sa nahitaboan sa krimen.
Ang patay’ng lawas ni Lopez gidala na sa Angel Funeral Parlor sa dalang Torres ning siyudad.
RadyoMan Joel Viray
