Gitakdang dad-on karong adlawa ngadto sa iyang pinuy-anan sa Benguet ang usa ka membro sa Special Action Force sa PNP kinsa namatay dihang nahitabo ang pinusilay tali sa operatiba ug sa pamilya sa gikatahong notorious nga gun-for-hire sa Marawi kadlawon kagahapon, Oktubre 30.
Samad-pinusilan sa walang bahin sa lawas ang hinungdan sa kamatayon ni Staff Sergeant Reagan Salbino samtang samaran ug nagpa-alim nalang sa usa ka tambalanan diri sa Iligan ang iyang kaubang SAF nga si Staff Sergeant Mohaimen Urandig nga naigo sa to-o’ng kamot.
Anaa sa St. Peter’s Chapel sa barangay Sta. Filomena ang haya sa maong SAF.
Mag-serve unta og arrest warrant ang kapulisan alang kang Abdullah Angantap Taurac, 40 anyos, didto sa iyang panimalay sa Barangay Lilod Saduc, Marawi City dihang nahitabo ang pinusilay tungod kay unang namusil ngadto sa mga pulis ang target.
Matud pa ni Colonel Madzgani Mukaram, director sa PNP Lanao del Sur, kasong homicide ang giatubang ni Taurac tungod sa pagpatay sa usa ka Saidamen Dimapingun.
Ilado, matud pa, kini nga gun-for-hire ug watchlisted nga drug personality.
Patay si Taurac samtang arestado ang iyang asawa, tulo ka mga anak-lalaki, usa ka anak-babaye ug ang bana niini, human makakuha ang mga utoridad og mga armas ug gituohang shabu sa ilang matag kwarto.
Matud pa ni Major Chris Cabugwang, hepe sa Provincial Drug Enforcement Unit sa Lanao del Sur, suspek si Taurac sa sunod-sunod nga pagpamusil sa Marawi City, lakip na ang pagpusil-patay sa usa ka sakop sa Army Engineer ug ang pagpusil sa usa ka estudyanteng si Ivan Almeda nga namatay human ang siyam ka adlaw sa tambalanan.
Gipailawom sa ballistic examination aron i-cross match ang armas niini ngadto sa nakuhang mga basiyo sa bala sa mga crime scene.
