Davao City- Gidunggab ang usa ka menor de edad alas 2:30 sa kaadlawon natigayun sa Purok 15 Brgy. 76-A ning dakbayan.
Sa report gikan San Pedro PNP, ang biktima naila nga si Ismael Villamor, 17 anyos, residente sa Bolton Isla ning siyudad samtang ang mga suspetsado gipang-ila mao sila si Eric Jamese Madelo, hingkod ang edad ug laing usa ka Jericho Nacar Funcion, hingkod ang pangidaron, pareho nagpuyo sa Sitio Kasilak Brgy. 76-A ning dakbayan.
Matud pa, samtang ang biktima nag inom niadtong tungora kauban ang iyang mga barkada didto sa basketball court sa nasampit nga barangay, kalit giduol ang biktima sa duha ka suspek ug sa walay daghang istorya gidunggab hinungdan ang biktima nakaangkon og samad sa likod sa lawas. Human sa panghitabo, ang duha ka nahisgutang suspetsado daling misibat sa wala matinong lugar samtang ang biktima gitabang ug gidala sa iyang mga barkada sa Southern Philippines Medical Center.
Samtang ang uyoan sa biktima nga si Darwin Serafica ang igo nalang sa pagdangop sa Presinto Dos San Pedro PNP aron usab niya paimbestigahan. Sa pagkakaron gihuwatan pa ang disesyon sa biktima kung intresado ba nga mo-file og kaso batok sa duha ka suspetsado.
RadyoMan Don Pulayao
