Mamahimong sensitibo sa inyong mga komento.
Davao City – Wala damha sa mga ginikanan nga sa ilang pagbiya sa panimalay, wala na silay anak nga mabalikan pa.
Nagtuo ang mga tawo ug silingan nga nahadlok ug nabalaka ang 12 anyos nga babaye human nalumos ang iyang 1 year old nga manghud hinungdan nga nagkalas sab kini sa iyang kinabuhi sa Lupon, Davao Oriental.
Sa pakighinabi sa DXDC RMN Davao sa fundraiser nga si Ma Resh nga usa sa nagatabang sa maong pamilya, iyang gibutyag nga anaa sa bukid ang ginikanan niadtong tungora ug nabilin ang mga bata.
Nasayran usab nga nagpuyo ang pamilya tunga sa kabasakan ug sa dihang nangabo og tubig ang maguwang, nagkabat-kabat ang manghud niini sa ilang panimalay ug didto na matud pa nahagbong sa drainage, nalumos ug nakabsan sa kinabuhi.
Sa pagkakaron, nangayo og pinansyal nga tabang ang pamilya tungod sa kalisod ug nanghanyo ang kabanay nga dako na usab nga tabang ang pag-ampo aron makaya nila ang maong pagsulay.
RadyoMan Ivy Parido
