Manila, Philippines – Hangad ni Senate President Tito Sotto III ang maligayang Pasko para sa lahat ng mga Pilipino at pagpapatuloy sa lahat ng magandang nakamit ng bansa ngayong taon.
Paalala naman ni Senator Win Gatchalian ang pagsasapuso natin ng tunay na diwa ng Pasko na may pagmamahal at pagmamalasakit sa pamilya at kapwa.
Para naman kina Senators Koko Pimentel, Bam Aquino, Koko Pangilinan at Chiz Escudero, mainam na gugulin ang Kapaskuhan kasama ang pamilya kaakibat ang pasasalamat at pamamahagi ng mga biyayang natanggap.
Hiling naman nina Senators Joel Villanueva at Richard Gordon, pairalin ang tunay na diwa ng Pasko tulad ng pagpapatawad, pagtulong at pag-unawa sa sitwasyon ng bawat isa.
Diin naman ni Senator Nancy Binay, ang diwa ng Pasko ay hindi nasusukat sa materyal na mga bagay sapagkat marami pa tayong maibibigay sa ating kapwa na magpapasaya sa kanilang Pasko.
Hinikayat naman ni Senator Gringo Honasan ang lahat na magtulungan, magmahalan at sikaping makamit ang ating mga personal na pangarap at inaasam-asam natin para sa isang malakas at matatag na Pilipinas.
Dalangin naman ni Senator Leila De Lima na manatiling matatag at nagkakaisa ang mga Pilipino sa gitna ng matitinding pagsubok na kinakaharap ng bansa.
