Davao City – Karong panahona, gikinahanglan ang pagpaminaw sa pulong sa Ginoo tungod kay mao kini ang makapalig-on sa atong pagsalig sa Diyos aron dili kita mawad-an sa paglaum taliwala niining pagsi-aw sa balatiang makamatay nga mao ang COVID-19.
Ning paghandum nato sa kamatayon ni Hesu Kristo aron maluwas ang mga sala sa kalibutan, importante ang pagpalig-on sa atong pagtoo aron kita makasugakod sa tanang matang sa mga pagsulay.
Sumala ni Sovereign Grace Baptist Church Pastor Andres Atup, ang mga nasinatian nato karon sama sa balatian, kalisud, kasamok ug uban pa, pulos kining tanan lumalabay lamang ug dili magdugay aron pahinumduman ang mga tawo sa pulong sa Ginoo.
Pahinumdom usab ni Atup nga ang mga kalisdanan porma sa usa ka pasidaan ngadto sa mga tawo nga gikinahanglang mobalik na gayud sa sabakan sa Ginoo ug dili lamang diha sa mga materyal nga butang sa kalibutan.
Matud ni Atup, himoon gayud nato nga una ang espirituhanong pagtoo diha sa Diyos inay sa mga butang sa kalibutan ug uban pang distractions or kahilayan.
RadyoMaN Bernard Pantallon
