GUIMARAS – Nasaksihan ni alias Baby, 11 anyos ang pagpatay sang riding-in-tandem sa iya amay sa Brgy Cabungahan San Lorenzo, Guimaras Domingo sang gab-i, Marso 3.
Samtang nagatalalamos ang luha, ginpahayag ni ‘Baby’ nga masakit para sa iya ang natabo sa iya amay nga si Ezequiel Cabrieto, head sang Municipal Disaster Risk Reduction and Management Office sang San Lorenzo, Guimaras.
Si “Baby’ ang ikatatlo sa apat (4) tanan ka mag-utod sa diin ang iya magulang isa ka seaman, ang ikaduha ara sa Leon kag ang agot nga 9 ka tuig ara man sa Guimaras.
Sang natabo ang insidnete, ara si ‘Baby’ sa ila tiangge nga nagabantay samtang ara sa gwa sang ila balaligyaan ang iya amay.
“Ang nakita ko lang nagsulod ang lalaki, nagpundo ang motor, nagdalagan siya dayun kay Tatay tapos hambal ya, Ikaw si Ezequiel? Sabat ni Tatay ato to si Ezequiel sa babaw. Tapos hambal sang suspek ikaw gid tuod nga si Ezequiel. Hambal ni Tatay indi ko ya si Ezequiel, hambal snag lalaki ikaw gid ya si Ezequiel. Tapos wala ko na mabatian maayo ang iban kay may customer ko ya nga nabantayan,” ang pahayag ni ‘Baby.’
Suno kay ‘Baby’ nakita man niya ang pagluthang sang suspek sa iya amay.
“Ginpatindog nila si Tatay sa pulungkuan tapos ginguyod sang isa ka tawo. Ang isa ka suspek ginduso ya man si Tatay pakadto sa gate nga mag-upod sa ila tapos wala si Tatay nag-upod. Hambal sang pakaisa ko nga si To Angga ‘maupod ka na lang Noy’ tapos hambal ni Tatay indi lang. Tapos pag ara na sa gate, ginguyod nila si Tatay tapos gulpi lang si Tatay natumba, gintiro nila,” ang panaysayon ni ‘Baby.’
Suno sa iya mataas ang panglawason snag suspek apang wala niya makita ang hitsura bangod may tabon ini.
Magluwas sa pagtiro sa iya amay, ginkuha pa sang mga suspek ang ila kwarta sa tiangge.
“Duha ka motor, tagduha-duha ga sakay… may customer kami sa tiangge gintabog ya pakadto sa likod tiangge tapos naglakat siya sa amon cashier-an nagkwa sang kwarta nga sobra P9,000,” dugang nga pahayag ni Baby.
Suno kay Baby wala siya snag matandaan nga nakontra ang iya amay.
Si Ezequiel Cabrieto tumandok sang Leon kag nakapangasawa sa San Lorenzo Guimaras sa diin diri na ini nagtrabaho bilang MDRRMo kag head sang bantay dagat sa ila lugar.
Nagapadayon karun ang imbestigasyon sang San Lorenzo PNP lakip na ang pagtumod kag pagpangita sa suspek.
