Davao City – Tumong nga mas pakusgan ang adbokasiya batok sa nagkadaghang insidente sa suicide nga gikalambigitan sa mga adunay problema sa mental health, nagapadayon sa pagpahigayon og Mental Health Drive ang Philippine Mental Health Association (PMHA-Davao) sa nagkadaiyang barangay dinhi sa siyudad sa Davao.
Sumala ni PMHA Davao Executive Manager Precious Manliguez, subay kini sa bag-ohay lamang nga pakigpulong nila kauban ang Davao City Councilors ug ubang representante gikan sa Department of Health (DOH) diin ‘awareness’ ang una nilang pwedeng himoon.
“Kini na awareness dili necessary nga magpalecture ta ug magbayad og mahal nga registration, kay naa ta sa grass roots level, ihatag nato ang lecture nga libre,” saysay niini.
Bisan pa man adunay gamay nga problema gumikan sa umaabot nga eleksyon, ginapaningkamutan nila nga makakoordinar sa nagkadaiyang barangay ning syudad diin ma-acknowledge ang ilang adbokasiya.
Dugang ni Manliguez nga kung kamo adunay mga problema o ginaatubang diin apektado ang mental nga aspeto, mamahimong matawagan ang PMHA sa mga numerong 09082339724 o bin ba kaha sa ilang landline nga 298-8579.
RadyoMaN Jason Amisola
