Davao City – Nagmalampuson ug nahimong mabungahon ang gilusad nga Mental Health Forum karong adlawa, Oktubre 9, sa DXDC RMN Davao nga gipahigayon sa Interface Computer College sa may Rizal Street, Davao City.
Uban ang Philippine Mental Health Association (PMHA), gisalmotan kini sa mokabat 100 ka mga estudyante sa maong tulunghaan gikan sa Junior High School, Senior High School ug College Students.
Gihatagan og pagduot ni PMHA Davao chapter Executive Director Precious Manlinguez nga walay mali hisgutan ang Mental Health sanglit importante nga masayod ang tanan ilabi na ang mga kabatan-onan kinsa sagad makasinati og depresyon.
Gani mapasalamaton ang Supreme Student Government (SSG) President nga si Gerald Cuizon sa nahimong partnership diin daghan sila og nakat-unan.
Ang patigayon gititulohang “Its OK not to be OK… Advocacy on Mental Health Awareness and Promote Preventive Measures against Depression” diin kini gipahigayon usa ka adlaw una ang pagsaulog sa World Mental Health Day sa Oktubre 10 samtang gideklara ang matag-ikaduhang semana sa Oktubre nga National Mental Health Week.
Gibutyag usab ni Misel Miral-Galve, special programs head sa DXDC nga daghan pang susamang forum ang ilusad sa DXDC isip tubag sa mga issue dili lamang sa mga kabatan-onan apan alang sa tanan.
RadyoMaN Jason Amisola
