Davao City – Sa lantaw sa Davao City Social Services and Development Office, mas malapdan pa karon ang pagtabang sa mga naghambin sa problema ug depresyon panahon mapatuman na ang Mental Health Law sa nasud.
Sumala ni CSSDO social worker Mansueta Boquinquito, daku’g ikatabang ang Mental Health Law alang sa pagluwas gikan sa kamatayon sa mga tawo nga gidisturbo og suliran ug giigo og depresyon.
Nasayran nga gipreparar na karon ang Implementing Rules and Regulations niini diin pipila ka adlaw gikan karon mapatuman na unya ang Mental Health Law kung asa ang konseho sa dakbayan nagpasar usab og kaugalingong bersiyon sa balaud.
Dili man ciento por cientong mapasalig ug masulti sa CSSDO nga matuldokan na sa hingpit ang suliran ug depresyon nga giatubang sa matag indibidwal, daku ang tsansa nga mahaw-as sila gikan sa malisud nga matang sa kinabuhi hatud sa sambog nga mga problema ning kasamtangang panahon.
Bisan tuod og adunay Mental Health Law, dili pa gihapon angay magkampante ang mga miyembro sa pamilya ug pasagdan na lamang ang ilang mga kabanay sa pagbitibt sa ilang bug-at nga problema kay puwede kini mahulog sa depresyon sanglit peligroso kini nga estado gumikan usab sa suicide, dugang sa maong opisyal.
RadyoMaN Joel Viray
