Davao City – Nasubo ang hut-ong sa mga eksperto sa suliran nga depresyon ang hinungdan sa paghunos sa kinabuhi sa pipila ka kabatan-onan karon sama sa diyes anyos nga batang babaye sa Los Amigos kinsa naghikog-patay dili pa lamang dugay.
Suma ni Counselor Gheena Agtas nga dili na talagsaon ang ingon ani nga insidente gumikan sa kadaghan sa mga linghod pa og pangedaron apan walay kukahadlok mihunos sa ilang mga kinabuhi tungod sa gihambing sa lahi-lahi nga problema sa kinabuhi.
Segun ni Counselor Agtas, ang insidente sa suicide aning panahona nagpakita lang nga aduna gayo’y problema ang sosyodad sa mental health nga nagkinahanglan og hinanali nga solusyon aron masalbar ang mga kabatan-onan gikan sa pagtapos sa ilang mga kinabuhi.
Matud niini, dili paigo ang kasamtangang mga balaod ug mga programa sa kagamhanan aron hingpit mahatagan og kasulbaran ang depresyon ug masanta ang pagkumitar sa pagkutlo sa kinabuhi sa mga tawo kansang nagbitbit og bug-at nga problema.
Adunay duha ka butang matud pa nga sa tan-aw sa nasangpit nga eksperto makatabang sa mga kabatan-onan ug sa mga hamtong nga miagi og kuyaw nga suliran nga sagad musangko sa pagpakamatay ugali dili gilayon mahatagan og kasulbaran.
Kini mao ang pag-interbinar sa mga ginikanan maingon man ang pagmudmod sa mga pagtulon-an sa pulong sa Dios sarang makapalig-on sa pagtoo sa Ginoo ug sa ispirituhanong kinabuhi.
Sumala ni Counselor Gheena Agtas, kung ang bata o bisan ang hamtong ma-umol sa gugma sa pamilya ug labaw na sa pulong sa Dios mawad-an og gahom ang depresyon aron diktahan niini ang pagbati sa matag indibidwal nga mag-hunos sa kinabuhi.
RadyoMaN Joel Viray
