Davao City – Walay nakitang bug-at nga rason si Mindanao Caucus Convenor Candido Aparece nga dugangan og kagahum ang mga awtoridad aron magukod ang mga terorista ug masumpo ang terorismo sa Mindanao.
Giingon ni Aparece nga paigo na ang kasamtangang mga balaud kontra terorismo aron makalihok ang mga pulis ug kasundaluhan sa pagsumpo sa terorismo ug paglutos sa mga terorista sama sa BIFF.
Hinoon wala na gitataw ni Aparece kung uyon ba kini o supak nga mas palapdon pa ang katungod sa mga tinugyanan sa balaud diha sa pagpanakop sa mga gisuspetsahang terorista.
Apan kung adunay koordinasyon ug pagtinabangay ang kapulisan ug militar sa kampanya kontra terorismo uban sa ayuda sa katawhan siguradong dili makasabwag og terorismo ang mga terorista.
Gipabuhagay pa niini nga dakong tabang ang National ID System ug ang mandatory prepaid SIM card registration sa bahin sa kapulisan ug kasundalohan sa pag-ila sa mga terorista ug masanta ang ilang laraw’ng dautan batok sa mga inosenteng tawo.
Wala na usab nagdugang og pamahayag si Aparece kun pabor ba kini nga i-detain ang mga tawo’ng madudahan nga terorista.
RadyoMaN Joel Viray
