Gipabakwit ganinang kadlawon ang halos 30 ka mga indibiduwal gikan sa Barangay Poblacion, Tubod, Lanao del Norte paingon ngadto sa main evacuation center sa munisipyo sa lungsod.
Kini human nga miapaw sa ilang mga balay ang tubig-baha nga dala sa walay hunong nga pag-ulan sugod alas-10:00 sa gabii sa Dominggo, Enero 10.
Matud pa ni Vicmar Paloma, head sa Disaster Risk Reduction and Management Office (DRRMO) sa Tubod, lima ka mga purok sa mga Barangay Poblacion, Pigcarangan ug Tangueguiron ang naapektuhan sa maong pagbaha nga miapaw sa mga kabalayan.
Ang maong mga barangay naa nahimutang sa mga low lying areas nga maoy daling baha-on tungod usab kay wala pa mahuman ang drainage system niining mga lugara.
Tungod sa maong pagbaha, natumba ang usa ka dakung punoan sa kahoy nga nakababag sa kalsada ug nag-landslide ang usa ka bahin sa Tangueguiron nga mitabon sa usa ka lane niini.
Nabalda og mga 45 minutos ang dagan sa trapiko apan na-resolba dayun kini human sa clearing operation sa mga opisyal sa barangay, sa LGU Tubod, sa Provincial Disaster Risk Reduction and Management Office (PDRRMO) sa Lanao del Norte, sa Philippine National Police ug sa Philippine Army.
Walay nasamdan o nakalas nga kinabuhi sa maong pagbaha. (Divina M. Suson, January 11)
Photo courtesy: MDRRMO Tubod
