Magplano na samtang sayo pa kung delikado ba ang areas kay ang linog dili matag-an matud pa. Mag andam sa mga panimalay, opisina ug trabahoan. Ang mga bug-at nga gamit, siguradohon nga nakakabit og sakto, itago daan ang mga mabuak aron wala’y maangol ug mga kemikal nga pwedeng mukatag nga hinungdan na hinuon sa sunog. Hibal-on ang mga exit routes, andamon ang emergency kit ug regular nga musalmot sa mga earthquake drills.
Panahon sa pagtay-og, giawhag ang tanan nga mahimong kalmado, buhaton ang DUCK, COVER, AND HOLD. Kung anaa sa huyang o gabok na nga mga buildings, mamahimong maghinay-hinay og gawas. Ug kung anaa na sa gawas, muadto sa open areas layo sa mga building ug poste sa kuryente. Kung anaa sa dagat, mupalayo dayon ug muadto sa taas nga lugar. Ug kung naa sa sakyanan, muhunong ug dili dayong mutabok sa tulay o dalan nga pwedeng mahugmak.
Human sa linog, mag-igmat sa posibleng mga aftershocks, sutaon ang kaugalingon ug mga kauban kung aduna ba’y naangol, mahimong updated ug mukooperar sa kung unsa man ang pahimangno sa otoridad.
Dugang pa nga dili magpataka og post o mutoo sa mga posts sa social media kung dili kini opisyal nga pamahayag gikan mismo sa otoridad kay sagad niini fake news nga makahatag og kahadlok sa uban nga mao na hinuon ang hinungdan sa disgrasya.
