Mga apektado sa baha sa Bago Aplaya, wa’y malung-ag nga bugas ug mainom nga tubig

Davao City – Wa na’y malung-ag ug mainom nga tubig ang mga residente sa Barangay Bago Aplaya human nga naapil og kabasa ang ilang mga bugas sa nahitabong pagbaha sa ilang lugar sa miaging gabii.

Gani, sumala kang outgoing Kapitan Isidro Dujali nga dunay usa ka pamilya baguhay lang nakapalit og usa ka sakong bugas ang wa na’y matak-ang ug makaon human naapil og kalubog sa tubig baha.

Busa gi-awhag niini ang mga Dabawenyo nga dunay malumong kasingkasing nga kon magdonar, mas maayo bugas ug mainom nga tubig na lamang kay mao kini ang mas gikinahanglan sa mga biktima sa kalamidad nga naa karon nag-istar sa evacuation site.

Nagpasalamat usab ang Kapitan sa DXDC RMN DAVAO ug sa RMN FOUNDATION tungod sa gitunol nga donasyon alang sa mga biktima karon lang buntag.

Sa karon, nagpahigayon na og assessment ug validation ang mga personahe sa City Social Services and Development Office sa tanang pamilya nga gibahaan.

Hinoon, luwas na ang mga Purok sa Barangay Bago Aplaya nga giagian og baha ug ang ubang mga nabahaan nakauli na ug nanglimpyo na sa ilang mga panimay karong panahona.

RadyoMaN Joel Viray