Mga armado nga nakapinusilay sa mga pulis sa Libertad, Misamis Oriental, paingon unta sa Tubod sa Lanao del Norte aron manulis

245

Gibutyag sa usa ka suspek nga nadakpan, human makigpinusilay ang grupo niini sa kapulisan didto sa Libertad, Misamis Oriental, niadtong Lunes sa gabii, nga paingon unta sila sa lungsod sa Tubod, Lanao del Norte niadtong tungora aron manulis.

Sa checkpoint nga gihimo sa kapulisan sa Libertad, kalit nga gipusil sa grupo ni Richard Son Perez ang pulis nga miduol sa ilang sakyanan aron unta ipahigayon ang normal nga inspeksiyon.


Patay ang pulis na si Staff Master Sergeant Ronald Caayupan samtang naka-ikyas ang tulo ka kauban ni Perez, kinsa nagpaila sa media nga Richard Manda.

Samaran sa maong pinusilay si Chief Master Sergeant Fernando Maestrado apan luwas na kini, matud pa ni Captain Rham Camelotes, hepe sa Libertad police.

Matud pa ni Perez nga taga-Cebu City siya ug gitawagan lang sa mga kauban aron mo-anhi og Mindanao alang sa ilang trabaho. 

Sa Barangay Barra, sa lungsod sa Opol, sa Misamis Oriental siya temporaryong nagpuyo ug didto na usab sila gikan sa iyang mga kauban nga dunay dala’ng mga armas ug granada. 

Wala na kini misulti kung asa nila gikan ang mga armas. 

Nadakpan si Perez kagahapon sa buntag sa gihimong joint pursuit operation sa Libertad ug Initao police nga nagtago lang sa kasagbutan ilawom sa tulay kung asa kini miambak kuyog ang iyang tulo ka mga kauban. (Divina M. Suson, DXIC Iligan City, February 19)

Facebook Comments