BAGO CITY, NEGROS OCCIDENTAL – Dululungan nga nag-alsa sang ila mga kamot ang halos tanan nga nag graduate nga pulis sa Public Safety Basic Recruit Course, class ‘Dakila’ sang PNP Regional Office – 6 kag Class ‘Masiklad’ sang PNP Regional Office – 18 sang ini sila ang ginpamangkot ni PNP Director General Ronald ‘Bato’ dela Rosa kon bala willing sila kag handa nga madestino sa Marawi City.
Ginpangunahan ni Gen. dela Rosa sang nagligad nga Biyernes ang graduation rites sang kapin 821 tanan ka mga bag-o nga pulis sa Manuel Torres Memorial Sports Center sa Bago City.
Sa iya pagpamulong pulong, ginpahayag sang PNP chief nga dapat ibutang sa pensar sang bagito nga mga pulis nga indi lang limitado ang ila serbisyo diri sa Negros Island Region kag sa Werstern Visayas kundi subong man sa nagkalain lain nga bahin sang Pilipinas.
Samtang, ginpabati-batian naman ni dela Rosa ang mga pulis sa Maasin Municipal Police Station sa Iloilo nga sining karon lang ginlusob sang mga katapo sang New People’s Army.
Suno kay Gen. Bato, wala niya nauyunan ang ginhimo sang mga pulis nga basta-basta lang ginsurrender ang ila armas sa mga rebelde kag wala man lamang nagbato.
Mahimo man sila ipadala sa Marawi City para pakigbatuan ang mga katapo sang Maute Group nga tubtob karon wala pa natapos sang gobyerno ang ila nga pagpalapnag sang gamo.
