Bagsak ang grado nga gihatag ngadto kang Presidente Rodrigo Duterte, sa mga taga-Marawi City kinsa nangawad-an sa ilang mga pinuy-anan ug mga kabtangan tungod sa lima ka bulan nga giyera batok sa mga terorista niadtong 2017.
Sa ilang State of Marawi Bakwit, pipila ka oras ayha ang State of the Nation Address sa Presidente kagahapon, nagtapok ang kapin kun kulang 500 ka mga bakwit sulod sa Mindanao State University-Main Campus sa Marawi City.
Kini dili aron ipanawagan ang pagpalagpot sa Pangulo, apan aron ipadayag ang ilang gibati nga pagkadismaya sa dagan sa rehabilitasyon sa ilang siyudad human kini maguba.
Matud pa ni Drieza Lininding, usa ka internally displaced person ug convenor sa civil society organization nga Moro Consensus Group, mag-duha ka tuig dihang gideklara ni Duterte liberation o kagawasan sa Marawi gikan sa impluwensiya sa mga terorista, apan wala pa gihapon sila makapauli sa ilang mga dapit sulod sa ground zero o most affected area.
Wala pa gihapon, matud pay, makit-ang istraktura nga nakatindog isip kabahin sa rehabilitasyon nga maoy gisaad sa gobyerno.
Sa ilang tan-aw, matud pa, anaa pa gihapon sa emergency response ang gobyerno tungod kay aduna pa gihapoy mga bakwit sa sa mga evacuation centers ug evacuation tents.
Sukwahi, matud pa, kini sa gisaad ni Duterte nga tabangan ang mga taga-Marawi nga makabangon pag-usab gikan sa trahedya sa labing daling panahon.
