Davao City – Nabalaka ang duha ka mga empleyado sa usa ka appliance center sa dihang ilang nakita ang duha ka mga kinalot nga bangag gikan sa parking lot padulong ngadto sa vault sa ilang establisemento.
Usa sa mga mireklamo si Vicente Magbanua Pendulas Jr., collector sa nahisgutang establisemento sa may J.P Laurel Ave.
Sumala pa sa collector, bandang ala una sa kadlawon duna siyay nadunggan nga mga pagbakbak sa semento nga nagsumikad ngadto sa parking lot sa gawas sa ilang tindahan.
Pag-abot sa kabuntagon ilang gisusi ang likorang bahin niini ug nakita nila ang duha ka mga bangag nga gitoohang padulong ngadto sa ilang vault diin didto nahimutang ang tanang mga importanteng dokumento ug cash.
Gitoohan nga binuhatan kini sa gikatahapang mga miyembro sa ‘Acytelyn Gang’ gumikan mao kini ang estilo sa ilang pagpangawat.
Sa mao nga impormasyon, dali kining gireport sa management sa appliance center sa kapolisan sa Sta. Ana aron mahimoan og hinanaling aksyon.
RadyoMaN Paul Canono
