Ivisan, Capiz- Nagpalab-ot sang reklamo sa talatapan sang DYVR RMN ROXAS ang pila ka mga residente sa Brgy Santa Cruz banwa sang Ivisan makaligad nga gin-ibanan sang isa ka libo ka pesos ang nakuha sang mga ini nga SAP assistance sa nasambitan nga barangay.
Sang ginpadulongan sang news team ang lugar, ginpahayag sang pila ka mga residente nga matapos nga mabaton sang mga ini ang kwarta balor sais mil pesos halin sa DSWD sila gilayon ang ginpasulod sa isa ka kwarto sa Barangay Hall kag ginkuha ang isa ka libo ka pesos.
Suno sa mga ini ang day care worker/teacher mismo sa amo nga barangay ang nagkolekta sang kwarta.
Aminado naman ang mga ini nga antes sila ginlista, ginsilingan sila nga ang amu nga kwarta ang igahatag kuno sa mga pamilya nga wala malakip sa SAP assistance.
Nahibaluan nga masobra sa 300 ka bilog ang nangin benepisaryo sang assistance gikan sa DSWD sa Brgy Santa Cruz Ivisan.
Panawagan lamang sang mga ini nga ipalayag kun sanday sin-o nga mga persona ang nahatagan sang kwarta nga ginbawi sa ila.
