Nagtakda na ug mga criteria ang tachnical working group nga gimugna sa Task Force Bangon Marawi, aron maoy musala sa mga pamilya nga unang mopuyo sa temporary shelters sa Barangay Sagongsongan, Marawi City.
Matud pa ni Farmida Macabando, Presidente sa Association of Barangay Council o ABC sa Marawi City, nga prayoridad nga mopuyo sa maong mga temporaryong pinuy-anan ang mga pamilya nga kanhi nagpuyo sa usa sa 24 ka mga barangay nga nasulod karon sa ground zero o kanhi main battle area.
Hinuon, giklaro ni Macabando nga gikonsidera usab sa mga prayoridad kadtong nagpuyo gawas sa kanhi MBA, apan ang ilang balay nasunog dihang nagpadayon ang giyera tali sa Daesh-inspired terror group.
Gitan-aw sa TWG nga konsiderasyon sa mga apektadong pamilya ang ilang interes nga mubalik ug puyo sa Marawi ug interes nga mopuyo sa Sagongsongan. Apan kinahanglang validated kini sa matag barangay, dugang ni Macabando.
Kinahanglan usab nga adunay kaugalingon balay ang benepisyaryo sulod sa ground zero niadtong wala pa mahitabo ang giyera.
Labaw sa tanan, kinahanglan walay klarong income ang maong pamilya.
70% niini nga mga benepisyaryo gikan sa evacuation center samtang ang 30% mga homebased.
