Midaug ang contingents gikan sa dakbayan sa Carcar sa habagatang sugbo alang sa Sinulog-based category samtang ang lungsod sa Daanbantayan sa amihanang bahin sa sugbo ang ni-dominar alang sa Free-Interpretation category atol sa gipahigayong Sinulog Grand Parade 2018 sa Cebu kagahapon
Nagkampeyon ang Carcar City human sa napu ka tuig nga pagsalmot niini sa Sinulog diin ilang gipakita sa ilang performance ang Senyor Santo Niño nga nagprotektar og usa ka singing contest champion gikan sa gihimong pagbarang sa napildi nga laing contestant .
Kataposang naangkon sa maong syudad ang second place nga kadaugan sa Sinulog Grand Parade niadto pang 2008 .
Gawas sa maong kampeyonato, nahakot sab sa Carcar ang best in costume ug best in musicality diin ang kinatibuk-ang nabulsa nilang premyo nikabat sa 1.2 milyones pesos .
Samtang, ang tribu kandaya gikan sa lungsod sa Daanbantayan ang midominar sa free-Interpretation category diin subling nakuha sab nila ang titulo human sa kinse ka tuig dihang midaug ang maong lungsod niadtong 2003 .
Nakuha sab sa Daanbantayan ang best in costume ug fourth place sa street dancing diin mibulsa sila og kinatibuk-ang 1.4 milyones pesos nga daug .
Karong tuiga, gipakita sa tribu kandaya ang usa ka gatos ka lain-laing dagway sa balaang bata Senyor Santo Niño isip paagi pagpadayag sa ilang debosyon ngadto sa Senyor .
Pipila ka mga out-of-town contingents nga misalmot sa Sinulog karong tuiga nakaangkon sab og mga premyo sama sa tribu buyoganon gikan sa Abuyog, Leyte nga maoy ni-kampeyon sa street dancing, best in musicality, ug second place sa free-interpretation category, ug ikaduha sa street dancing ang Catbalogan City, Samar .
Ang kulturan Panglaoanon gikan sa Panglao, Bohol nakadawat sab og premyo nga maoy fourth place sa best in musicality alang sa Sinulog-based category ug nakuha sab sa tribu kalivungan gikan sa North Cotabato ang fifth place alang sa free-interpretation category ug fifth place sab sa best in musicality alang sa maong kategorya .
