Handa na gid ang mga PUJ’s sa siyudad sa pagbiyahe sa idalum sang ginatawag nga “new normal “ suno kay ICLAJODA President Boyet Parcon.
Suno kay Parcon nga nabutangan na sang partition nga plastic ang tagsa ka unit para sa social distancing kag may mga alcohol kag disinfectants kag foot bath ang mga jeep para sa safety sang mga pasahero.
Suno pa kay Parcon nga kabahin sang new normal sa pagsakay sa mga jeep amo ang pagsuksok sang face mask sang mga pasahero kag ginadilian naman ang pagdaho –daho sang pamasahe.
sa pihak sini, ginpahayag ni Parcon nga basi indi pa makabiyahe subong nga adlaw ang tanan nga ruta sang jeep bangud padayon pa nga ginahikutar ang ila mga papeles sa LTFRB kag wala pa sang na-release nga mga car pass para sa mga makabiyahe nga mga jeep.
Nahibaluan nga base sa executive order ni Mayor Jerry Trenas , 25% lang anay sang PUJ’s ang pahanugutan nga makabiyahe sa pagsugod sang General Community Quarantine.
Samtang, ginpahayag ni Parcon nga bangud ginbuhinan sang 50% ang kapasidad sang mga jeepney, ginpasugtan sila sang LTFRB nga magsukot sang 9 pesos sa kada pasahero sa una nga 4 ka kilometros kag dugang nga 1.50 sa succeeding kilometers, samtang sa modernized jeep, 11 pesos naman ang minimum nga pamasahe kag may dugang nga 1.50 sa succeeding kilometers.
