Davao City – Gisupak ni Integrated Bar of the Philippines Davao City President Roger Largo ang pangisip sa uban nga reckless ug walay disiplina ang mga drivers sa Davao City.
Gibarugan ni Atty. Largo nga dili kaskasero apan disiplinado na ang mga drivers sa Davao City ug gani kamatooran niini ang pagmenos sa mga disgrasya sa atong mga kadalanan karon.
Kung kaniadto grabe ka kabadlungon ang mga drivers apan karon nasul-uban na sila sa disiplinado nga kinaiya sukad napatuman ang speed limit ug napailawom sa traffic and rules seminar sa kagamhanang lokal.
Kung ikumpara kaniadto ang mga drivers dako na kaayo og kalainan karon tungod nagmatngon na sila sa paglikay sa mga disgrasya ug pagsupak sa balaod trapiko ug kung duna ma’y musungag pipila lang ni sila.
Busa nagtoo si Atty. Largo nga dako na kaayo og kausaban ang mga drivers sa mga PUJ karon ikumpara sa una nga bastos ug walay disiplina.
Bisan pa og magtandi-anay, layo ra kaayo ang mga drivers sa mga depasayruan sa ubang lugar i-kumpara sa mga drivers sa siyudad sa Dabaw nga taas ulo nato mapasigarbo ang mga tsupers sa Davao City.
Apan ang gisaway sa pangulo sa hut-ong sa mga abogado mao ang ka-walay ayo sa mga traffic enforcers sa pag-implimentar sa mga balaod trapiko.
Pero giklaro ni Atty. Largo nga wala nagpasabot nga nagtinapol ang mga traffic enforcers sa ilang mga trabaho apan ang problema lang mao nga walay ngipon ang ilang pagpatuman sa traffic rules and regulations.
RadyoMaN Joel Viray
