Gidasig ni Mayor Baste sa ilang pagpanumpa ang mga opisyal sa Barangay nga ihatag ang tinud-anay nga pagserbisyo ug labaw sa tanan, ang pagtinabangay ug panaghiusa diha sa Barangay.
Dugang sa Mayor, isip Executive Officer o kapitan sa Barangay, kinahanglan nga neutral ug kung mahimo unahon ang pagtabang sa pinakaubos nga tawo sa ilang lugar.
“Siguro ang pinaka emportante sa atoa para sa atoa protekhan gyod nato tong looy dapig gyod sa looy ba kanang mga adunahan naa na mana sila kay dili nato gusto nga magkalayu bitaw ang gap dili man kinahanglan sa pagpanguwarta sa income pero ang gap bitaw sa oportunidad og kadtong naa sa ubos isaka gyod nimo kung mosaka man dapat kitang tanan”,sulti ni Mayor Baste.
Gipasabot sa Mayor, paningkamutan nato nga mahatag ang kaayohan sa atong lugar ug angay hinumduman ang politika sama sa sport lang, apan kung mahimo ayaw ninyo sayangi ang panahon.
Gi-awhag usab sa amahan sa syudad ang mga barangay official, kung adunay mga problema sa barangay ayaw kataha o kahadlok sa pagduol kay andam siya motabang aron mas molambo pa ang pagserbisyo sa barangay.
RadyoMaN Don Pulayao
