TACLOBAN CITY – Padayon nga naglalaum iton mga estudyante ha Samar State University o kun SSU nga maihatag na ha ira an 5,000 pesos cash assistance nga iginhatag han gobyerno para hadton mga estudyante nga nadarahigan han Supertyphoon Yolanda dida han tuig 2013.
Pinaagi han mga estudyante nga nagpapadara hin mensahe ha RMN Tacloban facebook page, ngada yana waray la gihapon hira nakakakarawat bis duling nga kwarta.
Dida pa han 1st week of November nakaandam an cheque ha Commisson on Higher Education Regional Office ngan an iba nga mga eskwelahan sugad han Leyte Normal University ngan Eastern Visayas State University in nakuha na ngan naipanhatag na ini ha mga estudyante.
Sumala kan Engr. Ronaldo Liveta, Officer-In-Charge han Office of Student Development and Services han CHED, kun mapupwede maihatag ini ha mga estudyante antis pa man magpasko pero ngada yana magbag-o nala nga tuig waray pa nakakarawat iton mga estudyante ha SSU.
Nananawagan naman kami dinhi han 99.1 RMN radio han RMN Tacloban ha mga gintutuinan han mao nga unibersidad nga asikasuhon na ini para diri na maglinaom iton mga estudyante, naghuhulat liwat kami han iyo opisyal nga pahayag.
