Mga estudyante ha Tacloban, nag-rally pagtipa han pederalismo, TRAIN law ngan iba pa

TACLOBAN CITY – Ginpangunahan han pira nga mga estudyante han University of the Philippines Visayas Tacloban campus an national walk-out day nga gindumara kakulop.

Ira gin-protestahan an mga programa nga ginpapatuman han administrasyon Duterte sugad han Charter change partikulkar ha pederalismo, tax reform law, jeepney modernization program ngan martial law ha Mindanao.

Purluminos 50 nga mga estudyante tikang ha UP ngan EVSU ngan 20 nga mga trabahante an nagpartisipar ha mao nga walk-out day.


Sumala kan Mira Legeon, Chairman han Anakbayan Eastern Visayas, an pambansang walk-out in diri la ha mga estudyante kundi ini in para gihapon ha tanan nga sektor nga diri naabuyon ha ginpapatuman nga mga programa han administrasyon Duterte.

Samtang, ginklaro naman han usa nga professor ha UP nga hi Joycie Alegre nga waray problema ha ira an pag walk-out han pipira nga mga estudyante mahitungod nga hira in nagpapakita la han ira pagigin aktibista ngan nagpapadangat han ira magkadurudilain nga opinyon. Pero magin responsible daw la gihapon an mga estudyante ha ira gin buhat nga pag-absent.

Facebook Comments