Gibutyag ni City High Principal IV Evelyn Magno nga ang City Health Office nagpadala og sulat sa DepEd Davao City Division ug girekomenda ang pagsul-ob og facemask sa tanang mga estudyante kini aron malikayan ang bisan unsang mga balatian sama sa ubo, sip-on, ug kalintura nga mi-uso karon hatod sa pagusab-usab sa dagan sa panahon.
Giingon ni Magno nga human nila madawat ang Memorandum, gilayon iyang gipaimposar ang pag-suot og facemask sa mga estudyante sugod kagahapong adlawa.
Gitataw ni Magno, nga puwede gihapon makasulod ang mga estudyante sa eskwelahan bisan og walay facemask sanglit ang Memorandum nagsulti nga usa ka rekomendasyon ug pagdasig, busa di pugson ang mga estudyante kon magsul-ob ba sila o dili sa facemask.
Apan kon mamatikdan nga dunay sintomas sa ubos, sip-on ang usa ka estudyante, gilayon kini dad-on sa ilang school clinic aron masusi ang kahimtang sa usa ka estudyante ug human masusi gilayon sila papaulion basta ma’y ginikanan nang magsundo.
Sa datos nga gihatag ni Magno gikan niadtong Setyembre 1, 2023, kapin gatos na sa mga estudyante gikan sa lahi- lahi nga year level ang nadala sa clinic human nakasinati og kalintura, ubo, ug sip-on, hinoon mikonhod na ang maong ihap sa mga estudyante nga nakatagam- tam sa naasoy nga mga balatian karon.
RadyoMaN Joel Viray
