Pagadian City – Nagbaha ang pag-ampo ug pahasubo nga nidangat sa RMN-DXPR Pagadian Facebook Page dihang gipadangat ang taho kabahin sa kamatayon ni Julian “Teban” Daan kagahapon sa hapon samtang naka-confine kini sa usa ka pribado nga ospital.
Alas 4:55 sa hapon nabugtuan sa kinabuhi ang kanhi Cebu Provincial board member ug kasamtangang Talisay City councilor. Pinaagi sa iyang anak nga si Lester, nahibaw-an nga cardiac arrest ang hinungdan sa iyang pagpanaw.
Naila ang maong sikat nga radio icon tungod sa iyang makalingaw nga banat sa mga radio drama ug segment sama sa “Kung Ako Ang Pasultihon” sa DYHP 612 nga gipabati usab dinhi sa DXPR 603. Naila pud kini isip banggiitang script writer ug responsable nga public servant.
Nitunol sa ilang pag-ampo, pahasubo ug kahingawa ang mga nagsunod sa iladong radio icon nga mga taga-Zamboanga del Sur ug Pagadian ngadto sa iyang mga kabanay labi na sa iyang kapikas nga si Maam Yoly, hegala ug kauban sa trabaho.
