Bayog, Zamboanga del Sur – Nagkaengkwentro ang kasundaluhan sa 97th Infantry Battalion ug sa New People’s Army (NPA) sa Barangay Balukbahan, Bayog, Zamboanga del Sur kaniadtong Martes sa hapon.
Gihimo ang security patrol sa maong dapit human nakadawat ang tropa ug daghanang mga taho nga adunay presensya sa armadong grupo ug mga extortionist.
Sigon ni 97IB Commanding Officer LtCol Manaros Boransing, mireklamo na ang mga lumulupyo sa maong dapit gumikan sa pagpang abuso sa NPA pinaagi sa pagpugos kanila nga mohatag ug kwarta ug pagkaon niining kasamtangang krisis sa COVID 19.
Sigon ni Boransing, atol sa engkwentro swerteng walay tropa nga nasamdan samtang dili pa usab matukib ang ihap sa mga gikaengkwentrong NPA.
Sa maong dapit, narekober sa tropa ang pipila ka mga gamit sa NPA nga naglangkob sa usa ka M16A1 assault rifle, usa ka Improvised Explosive Device (IED) ug uban pang gamit panggyera.
Samtang padayon nga giawhag ni 1st Infantry Division Commander Major General Generoso “Gene” Ponio, ang mga membro sa NPA nga monaug na sa kabukiran ug pahimuslan ang mga benepisyo nga gitanyag sa gobyerno nga mao ang Enhanced Comprehensive Local Integration Program (E-CLIP).
