Sa pakighinabi sa DXDC RMN Davao kang Jeanette Ampog, ang Talikala Executive Director ug human rights advocate, iyang gibutyag nga mahitabo ang kagubot sa panimalay ug pagpangabuso ngadto sa kabatan-onan tungod sa kainit sa ulo sa mga ginikanan resulta sa mga problema ug kawad-on.
Matud ni Ampog, abri ang mga ahensya aron muhatag og mga serbisyo sama sa livelihood program kung ang ginikanan walay trabaho, aduna usab mga serbisyo sama sa family session ug mental health seminars aron mapabiling lig-on ang pundasyon sa pamilya.
Kini nga panawagan nagsumikad sa balitang usa ka 7-month-old baby ang gilambos ug napatay sa iyang amahan sa Magsaysay, Davao del Sur. Usa ka 8 anyos nga batang lalaki sa General Santos City ang kabsan sa kinabuhi human gikulata sa iyang amahan ug laing 17 anyos nga dalagita ang gitigbas sab sa iyang amahan sa Vigan City.
“Panawagan nako, file-lan og kaso ang amahan. Aron mahimo ni siyang leksyon sa tanang mga ginikanan nga ang pag-atiman og anak, ang pag-amuma og anak dili sayon. Therefore maghunahuna ta kung gusto ta manganak. Daghang oportunidad nga mukat-on ta sa atong pagka ginikanan. Paano ta mu-deal og mga bata nga naga-assert siya sa atong pagka ginikanan and yet we respect the rights of our children,” pamahayag pa ni Ampog.
RadyoMaN Ivy Parido
