Nagsugod na niadtong Sabado, Disyembre 21, ang mga residente sa Marawi City sa pagtukod og balik ug pag-repair sa ilang mga balay sulod sa most affected area nga nangaguba tungod sa lima ka bulan nga giyera batok mga extremists niadtong tuig 2017.
Ang unang batch gilangkuban sa 20 ka mga pamilya sa Barangay Tolali, usa sa 24 ka mga barangay sulod sa 250,000 hectares nga most affected area.
Matud pa ni Marawi City Mayor Majul Gandamra, 18 sa maong mga pamilya ang igo lang mag-repair sa ilang mga pinuy-anan sanglit gamay’ng kadaot lang man ang nahitabo.
Ang duha kanila, magsugod gyud og tukod human maugdaw ang ilang mga balay panahon sa giyera.
Miingon si Gandamra nga aduna nay kapin 400 ka mga pamilya ang nahatagan og permit nga magtukod na pag-usab o kaha mag-repair sa ilang mga pinuy-anan sa Barangay Tolali lamang.
Ang maong kalihukan, matud pa, nga gitawag og Kathagombalay o pagtukod og usab sa pinuy-anan, sinugdanan lamang sa hinay-hinay nga pagbalik sa mga residente sa ilang matag dapit ug pagbangon gikan sa kalamidad.
Sunod semana isunod ang ikaduhang batch sa susamang barangay.
