Nagmando na kagahapon ang United Imams of the Philippines Foundation, Inc. o UIPF, ngadto sa ilang mga miyembro ug sa ilang ubang partner organizations sa nasud nga sundon ang mga health measures, subay sa Proclamation Number 922 ni Presidente Rodrigo Duterte nga nag-deklara og state of public health emergency sa nasud.
Sa sulat-pamahayag niini, nga pinetsahan og Marso 18, nagkasabot ang mga board of directors ug ang mga opisyales sa UIPF nga ang pagsimba nila matag adlaw’ng Biyernes o ang Friday Khutba, imbes usa ka oras, himoon nalang nga 20 minutos.
Lakip sa maong gidugayon ang duha ka mga rakaah of prayer, sugod ugma, Biyernes, Marso 20, hangtud nga magdesisyon ang asosasyon sa pagbakwi niini, matud pa ni A’lim Saad Amate, ang grand Imam ug national president sa UIPF.
Ang susamang sulat-pamahayag nag-awhag sa mga bata, mga senior citizens ug kadtong aduna nay mga sakit daan o mga pre-existing medical conditions ug allergy nga dili na motambong sa ilang congregational Friday prayers.
Ang mga symptomatic sa COVID-19 gi-rekomenda nga isumiter ang kaugalingon alang sa hospital aron kini ma-isolate o kaha ma-quarantine.
Susamang rekomendasyon ang pag-disinfect ug pag-sanitize sa mga masjids, nga dunay koordinasyon sa mga hintungdang ahensiya.
Ang mga masjids, mga Islamic boarding schools ug mga Madrasah gi-awhag nga suspendehon na ang ilang mga Islamic symposia, mga conference ug dili na modawat og mga bisita.
Dungan sa pagbuhat sa maong sulat-pamahayag, namugna ang task force nga gilangkuban sa UIPF, mga healthcare professionals nga gikan sa Muslim Medical Association, faith-based leaders network ug uban pa’ng mga stakeholders aron mohatag og guidance sa Muslim community.
Sama sa gisunod na sa ubang organisasyon, gi-bawal na ang beso-beso, pag-gakos ug uban pa’ng mga physical contact isip greetings, mga panagtapok o mass gatherings ug gipa-obserba ang social distancing.
Ang mga Muslim religious leaders nagpagawas sa maong pamahayag human nasuta nga duha ka mga namatay tungod sa COVID-19, mga Aleem, nga gikan sa Lanao del Sur. (Divina M. Suson, March 19)
