Bumisita ha Tacloban City kasangkulop hi Norwegian Ambassador to the Phililippines Eric Forner matapos nga imbitahan hiya han Consuelo Foundation ngan Streetlight Foundation para tumambong han pag inaugurate han two storey building ha Brgy 108, Tagpuro Tacloban nga magseserbe kumo Training Center sugad han technical, vocational ngan life skills para hadton mga kabataan nga gin abuso, mga kabataan nga napariwara, ngan mga kabataan nga hadi gumamit hin ginbabawal nga droga.
Kumo Peaceful Nation ngan Happy Country an Norway ha bug-os nga kalibutan, nagpapasalamat hi Ambassador Eric Forner nga may mga sugad hini nga foundation ilabi na ha Tacloban nga nabulig ha mga kabataan nga napapariwara.
Ha bulig gihap han TESDA, makakagtikang na pag training an sobra 50 nga mga beneficiaries han nasabi nga foundation para hiton ira vocational courses.
Ha pagkita han RMN news team hini nga mga kabataan baga la hira hin waray may gin agian nga maraot.
Suma la kan Atty, Carmela Andal Castro Managing Director han Consuelo Foundation, sigurado na nga makakatrabaho an mga kabataan nga magtatapos ha ilarom han ira foundation.
Naglalaum liwat hi Ambassador Forner nga damo pa nga mga kabataan ha Tacloban an unta mabuligan pinaagi han programa han bag-o nga foundation tikang ha Norway nga tuyo pagbulig ha syudad han Tacloban.
