ILOILO City – Imbes nga sa simbahan, police station ang ginderetsuhan sang mga kabataan nga na-involve sa kinagamo sa Molo kaina sang aga, Disyembreb 21.
Suno kay alyas Toto, 16 anyos, ginsumbag siya ni “Arjo” sang grupo nga 5 Star gang sa kilid sang simbahan sa Molo.
Sa interview sang RMN Iloilo sa iya, ginpahayag sini nga posible may dumot sa iya si Arjo bangod naka-agi na sila away sadto.
Subong man, nasettle na ang ila away sadto kag nagpinasensyahanay na.
Nahibaluan nga si Toto ang miembro sang grupo nga Wangnae Gang samtang ang grupo naman ni Arjo ang kabahin sang 5 Star gang.
Suno kay Toto ginhangkat siya sang rambol ni Arjo.
Bangod sa kinagamo nga ginkaulamiran, ginpangdakop sang pulis ang mga pamatan-on kag ara sila karun sa paghinakop sang Molo Police Station. /// Report via Flo Navarrete
