TACLOBAN CITY – Iginkakabaraka han Police Regional Office 8 an datos han nagpapakamatay o suicide incident dinhi ha Sinirangan Bisayas.
Basi han datos tikang ha Women And Children Protection Desk (WCPD) han Regional Investigation And Detective Management Division, umabot ha 71 an insidente han nagpapakamatay dinhi ha rehiyon otso tinikangan dida han bulan han Enero tubtob Agusto yana nga tuig.
Sumala han Crime Information Reporting and Analysis System, problema ha pamilya an pinaka-nagawas nga resulta kun kayano may nagpapakamatay dinhi ha Sinirangan Bisayas. 84.51% ha mga insidente in ginbubuhat ha sakob han ira panilamalay.
21-30 anyos nga kalalakin-an iton kadam-an nga nagsusuicide kaysa ha kababayin-an. Mas impulsive daw iton mga lalaki kaysa ha mga babayi. Ginpipili han mga kalalakin-an nga igtago nala an ira problema ha ira mga kalugaringon kaysa pag-uruistoryahan ini han ira pamilya.
Ha Leyte iton pinakadamo nga nailtala nga mga nagpapakamatay kun diin 34 iton ihap han insidente, 7 dinhi in mga babayi ngan 27 in mga lalaki.
Ha Southern Leyte, 11 an suicide incident, 5 in mga babayi ngan 6 in mga lalaki.
Ha Samar, 10 iton nailatala, 2 in babayi ngan 8 in mga lalaki.
Ha Northern Samar, 6 iton naitala, usa iton babayi ngan 5 naman an mga lalaki.
Ha Tacloban City naman in 4 iton naitala, 2 in babayi ngan 2 naman in mga lalaki.
Ha Biliran ngan Eastern Samar naman in mayada usa nga lalaki an nagsuicide.
Sumala han PNP Region 8, naghihikog iton komon nga ginbubuhat han mga biktima.
