Magapangatubang sang kaso kriminal kag administratibo ang mga kandidato nga nagapangharass sa mga botante gamit ang New Peoples Army ukon NPA.
Ini ang paandam ni Police Regional Office 6 Director Brigadier General John Bulalacao sa ginhiwat nga 2nd Visayas Joint Peace and Security Coordinating Council meeting.
Ginpahayag ni Bulalacao nga madamo sang kaso nga mahimo ipasaka batuk sa mga kandidato nga nagagamit sang NPA agud maangkon ang kadalag-an sa eleksyon.
Nahibaluan nga may mga impormasyon nga may mga kandidato nga nagahatag sang permit to win sa mga rebelde kon sa diin pinaagi sini magapang-harass ang NPA sang mga botante agud piliton nga botohon ang natungdan nga kandidato.
Gindugang pa ni Bulalacao nga magluwas sa kaso kriminal, mapasakaan man sang kaso administratibo ang mga opisyal nga nagahimo sang kalakasan gamit ang NPA para maduso ang kaugalingon nga interes.
