Zamboanga del Sur – Hingpit na nga naproklama sa Commission on Elections (COMELEC) ang mga mananaug sa kagahapong adlawa.
Alas 2:55 ang takna sa kadlawon pormal nga giproklama si Engr. Victor Yu isip bag-ong gobernador dinhi sa probinsya. Si Yu ang nakakuha ug 280, 411 ka mga boto, labaw kini ug 98,651 ka mga boto sa iyang kaatbang nga si Aurora Cerilles.
Sa pagka bise gobernador, si Roy Ariosa nga nakahipos ug 248,545 ka mga boto labaw kini ug 61,357 ka mga boto sa kaatbang nga si Ace William Cerilles.
Sa board member sa 1st District, nag-una si Boy Baleleng Fernandez, ikaduha si Roger Saniel, ikatulo si Julu Dacal, ikaupat si Djanggo Villamero ug ang ikalima mao si Almando Sanoria.
Sa Segundo distrito, nag-una si John Regala, ikaduha si Eking Vidad, ikatulo si Raul Famor, ikaupat si Loloy Poloyapoy ug ang ikalima mao si Dang Mariano.
Giproklama usab isip congressman sa unang distrito si Divina Grace Yu nga nakaangkon ug 164,990 ka mga boto labaw kini ug 45,849 ka mga boto sa kaatbang nga si Marlyn Revelo ug sa ikaduhang distrito mao si Jun Babasa nga nakakuha ug 94,362 ka mga boto labaw kini ug 6,288 ka mga boto sa kaatbang nga si Antonio Cerilles.
Giproklamar na usab niadtong sabado sa City Board of Canvassers nga gipangunihan ni Atty. Reymond Calo ang mga midaog nga kandidato alang sa dakbayan sa Pagadian.
Alang sa pagka-Mayor sa syudad gideklarang mananaog si Sammy Co nga maoy pambato sa PDP-Laban nga nakahipos sa botos nga niabot 51,572.
Gituboy usab nga nidaog sa pagka-bise Mayor si Mapi Obaob nga nakatigom sa botos nga 44,680.
Napiling mga konsehal sa dakbayan si Sam Tyra Co, Glavys Gavenia, Jigger Ariosa, Dodong Duterte, Doktora Dicky Fernandez, Fernando Pameron, Troy Asugas, Dodong Cagampang, Tata Quicoy ug Jesus Bajamunde Jr.
Tungod niini, mapasalamaton ang Team Asenso sa Labaw nga Makakagagahom ug sa katawhan nga botante tungod sa pagsalig nga gibubo sa katawhan ngadto kanila aron makaserbisyo ug maka-pangalagad pinaagi sa pagmugnag mga proyekto ug programa sa syudad ug lauman matud pa ang bag-ong pamunuan ilalum sa iyang administrasyon.
Samtang pipila ka mga supporters ang mipaabot sa ilang kalipay sa mga mananaug ug mga bag-ong napiling mamunuan dinhi sa probinsya sa Zamboanga del Sur.
PHOTO: Credit to PDP LABAN Zambo Sur
