Sarangani Province–Hilabihan ang pagpasalamat sa mga katawhan sa Glan, Sarangani Province tungod nahimong nagmasadyaon og nagmalampuson ang pagtapos kagahapong adlawa, adlaw nga Lunes, sa kasaulugan sa ilang ika-104 nga foundation anniversary og ika-19 nga Lubi-Lubi Festival taliwala sa hisgutanan sa seguridad sa tibuok Rehiyon Dose.
Walay laing mensahe si Governor Steve Chiongbian Solon kagahapon kundili nga magpabiling magtinabangay ang mga katawhang Glanians.
Nagkalisod karon ang tibuok Pilipinas sa suplay sa bugas, apan sa Sarangani Province partikularminte ang Glan ang gikaluy-an matud pa sa Kahitas-an segun ni Governor Solon, tungod kay aduna kini siyam (9) ka upland barangay nga pasiunang benipisyaryo sa SAAD upland rice and livestock livelihood program nila Pangulong Rodrigo Duterte og Agriculture Secretary Manny Piñol, kung diin may pasiunang na-harvest na nga 83 metric tons nga upland nga humay, 19 metric tons nga white corn o puting mais, og 220 kilos nga mga gulayon, may pasiunang pondo gibubo ang SAAD dili muubos P22 Milyones ka pesos para lang sa Glan beneficiaries, wala pay apil ang mga imprastraktura og social services nga dala nila Senador Manny og Congressman Ruel Pacquiao og sa Sulong Sarangani flagship program.
