Pipila ka oras human mahidangat sa ilang pinuy-anan sa Barangay Lapasan, sa Clarin, Misamis Occidental ang patay’ng lawas ni Mayor David Navarro, nangabot ang mga kauban niining mayor sa lain-laing lungsod sa lalawigan.
Unang miabot sa pinuy-anan sa mayor kung asa kini gihaya si Mayor Samson Dumanjug, sa lungsod sa Bonifacio, kinsa mao usab ang presidente sa League of Municipalities of the Philippines, o ang organisasyon sa mga mayor, sa Misamis Occidental Chapter.
Gisundan kini ni Mayor Samuel Parojinog sa lungsod sa Tudela.
Matud pa ni Dumanjug nga naglisod pa siyag dawat sa nahitabo kang Navarro, kinsa namatay human gi-ambush ang patrol sa pulis nga gisakyan niini paingon sa pikalya sa Cebu.
Panawagan ni Dumanjug ngadto sa mga hintungdang ahensiya, nga mohimo og imbestigasyon sa nahitabo, aron mahatagan og hustisya ang kamatayon sa mayor nga nalakip sa narcolist ni Presidente Duterte.
Miingon si Dumanjug nga mao kini ang ilang matabang sa pamilya sa namatay aron pagkab-ot sa hustisya.
Human nangayo’g eksklusibong oras ang pamilya pagpahimutang sa patay’ng lawas kagahapon, gibuksan gilayon sa publiko ang haya apan karong adlawa pa gilaumang modagsang ang mga supporters lakip na mga kaubang mayor.
Sa Nobyembre 3 ang gitakdang lubong sa kanhi mayor diha lang sa usa ka luna kilid sa ilang pinuy-anan.
