Bag-ohay ang pagsulod sa 2021 dihang nabalita ang pagkamatay sa usa ka flight attendant nga si Christine Dacera kinsa napalgang unconscious na sa bathtub sa usa ka hotel sa Makati, Metro Manila sa New Year’s Eve party uban sa iyahang mga barkada.
Karong tuiga usab ang 11 ka mga personalidad kun mga higala niini ang na-clear sa reklamong rape ug homicide.
Niadtong Agosto 2021, nakumbikto sa kasong murder ang ex police nga si Jonel Nuezca sa pagpusil-patay sa mag-inahang Sonya a ug Frank Gregorio sa Paniqui, Tarlac, niadtong December 2020, tuig usab sa nahitabong krimen, Disyembre 2021 napalgang patay si Nuezca sa New Bilibid Prison (NBP).
Alang sa atong Regional news, sa M’lang, North Cotabato, mangilngig ug brutal nga gipamatay ang mag-igsuong Crizzle Gwenn ug Crizville Louise Maguad diin ang prime suspek ang gipapuyo sa ilahang pamilya nga menor de edad nga dalagita nga anaa karon sa kustodiya sa DSWD, ug gikasuhan na og murder uban ang laing at large pa nga suspek.
Sa Provincial news, human mapasang-at na ang kasong murder sa korte sa Bansalan, Davao del Sur batok sa suspek nga mipusil-patay kang Davao del Sur reporter Orlando “Dondon” Dinoy niadtong Oktobre 30, 2021 gina-track down na sa mga awtoridad ang maong gunman nga si Brandie Mercado Campaner nga aduna usab laing warrant of arrest sa kasong murder didto sa Digos City, Davao del Sur.
Samtang sa Davao City, gibutyag ni Davao City Police Office City Director Police Col. Kirby John Kraft nga 98% ang na-clear nila sa sobra 400 ka mga kaso gikan Jan 1-Dec 27, 2021.
Matud ni Kraft gikonsidera nilang case solved ang duha ka mga murder cases ug parehong personal grudge ug land disputes ang mga motibo sa pagpatay sa mga kapitan nga sila Barangay 9-A Kapitan Roderico “Tata” Llubit nga gipusil patay niadtong Mayo 25, 2021 ug 6 ka mga suspek ang gikasuha’g murder, ang prime suspek nadakpan sa kasong droga ug priso na samtang gikasuhan na ang gunman nga nipatay niadtong Oktobre 2, 2021 kang Brgy Datu Salumay, Marilog District Kapitan Amado Mansamo Mansabid.
Dakong hagit gihapon karon sa DCPO ug SITG ang pagsolbad sa Sapie Double Murder Cases tungod wala pa gihapoy nipatim-aw nga mga eye witnesses sa pagpatay sa magtiayong Atty. Sitti Gilda Mahinay-Sapie ug bana niini nga si Muhaiman Sapie sulod mismo sa subdivision nga ilang gipuy-an sa Barangay Talomo ning syudad sa Davao niadtong Hunyo 14, 2021.
Gipanganti ni Kraft nga paningkamutan niining masolbad ang krimen ug matunol ang hustisya sa mga nailong pamilya sa magtiayon pinaagi usab sa gitukod nga Special Investigation Task Group.
“Iba-iba po kasi ng motibo, may personal grudge, may land dispute, iyon ang mga usual na mga dahilan kung bakit nangyari ang mga krimen na ito (sa Davao). Ang kagandahan 99% na solve po natin ang mga krimen na ito. Although mayroon pa tayong natitirang isa iyong kay Atty. Sapie ginagawa natin ang ating makakaya upang ma-solve din po ito,” sumala ni Kraft.
Matud ni Kraft dakong bili ang pulidong mga ebidensiya ug mga credible witnesses aron sa paghatag og katin-awan ug solusyon sa mga krimeng gapanghitabo.
RadyoMaN Aimee Guinita
