Davao City – Wala na makadako pa ang kalayo sa gisunog nga effigy ni Presidente Rodrigo Duterte, Chinese President Xi Jinping ug US President Donald Ronald Trump human nga dali kining gipalong sa mga awtoridad.
Gibatbat ni Davao City Police Office Director PSSUPT Alexander Tagum tataw kini nga pagsupak sa balaod sa dakbayan.
“Dili nato ni tugutan kay kabalo ta it’s a violation of the Clean Air Act o Republic Act 9003 of the Solid Waste Management Act of 2000 nga dili gyod pwedi nga magsunog og effigy nga makaapekto sa health sa publiko ug dili pweding matuman ang inyong iligal nga activity,” sumala ni Tagum.
Sumala ni Tagum pangkasuhan nila ang mga lideres sa nga nanguna sa pagpanunog.
“Naa miy mga ebidensya gikuhaan namo sila’g mga video para mai-dentify namo kinsa ang mga lider, kinsay nag-instigate, kinsay nagsugo ug kinsa nagsindi og lighter para sindihan ang effigy,” matud ni Tagum.
Gipasabot ni Tagum nga kung sa nakalabayng higayon gipasagdan lang nila ang gihimong pagpanunog karon ila gayod ipatuman ang balaod.
“We admit nga we come unprepared masyadong we follow exactly ang instruction nga maximum tolerance but we forgot that people are violationg the law,” sumala ni Tagum.
Samtang si Kilusang Mayo Uno (KMU) XI Southern Mindanao Secretary General Carlo Orlala wala makauyon sa pagpugong kanila sa mga awtoridad atol sa ilang pagdabdab sa mga effigy.
“Grabe ang pagpugong nila aron makalusad ta’g programa nga makita ang unsang mga reaksyon sa mga katawhang Pilipino kay ang pagsunog sa effigy kay reaksyon namo ug pinakataas namo nga porma aron among mapakita nga wala mi nalipay sa pangulo sa iyang wala niya pagtuman sa iyang saad sa duha ka tuig niya,” matud ni Orlala.
Depensa ni Orlala gipaniguro nila nga wala gayuy madisgrasya atol sa ilang pagpanunog sa effigy.
“Kanunay nila nga ginahisgot nga mukaso sila, Clean Air Act gani dinhi sa Binugao Coal Fired Power Plant nga nagabuga og dinaghang mga aso wala sila mukaso niana,” matud ni Orlala.
RadyoMaN Aimee Guinita
