Davao City – Gipaniguro sa gobyerno nga ilang mapahilona ang anaa sa 158 households sa Tagum City nga maapektuhan sa Mindanao Railway Project diin gikatakdang ipahigayon ang ground breaking niini sa Pebrero 2019.
Kini ang gibutyag ni Arturo B. Manigo Jr., coordinator sa Davao Integrated Development Program (DIDP) – Tagum City human nasayrang ubay-ubay nga kabalayan ang maapektuhan tungod sa maong proyekto.
Ginasapinal na usab kung unsa kadako ang maigo sa matag household human sa ilang gipahigayon nga ground ug drone survey.
Gibutyag usab ni Manigo nga sugdan ang construction sa Mindanao Railway sa Tagum City ug sa maong dakbayan usab partikular na sa Brgy. Mankilam ipahimutang ang depot sa gitaganang 10 hectares nga gilapdon.
Nasayran nga karong Nobyembre 28, 2018 dinhi sa dakbayan sa Davao gikatakdang ipahigayon ang signing sa Memorandum of Agreement (MOA) tali sa Department of Transportation (DOTr) ug Local Government Units (LGUs) nga gilangkuban sa Tagum, Carmen, Panabo, Davao City, Sta. Cruz ug Digos City.
RadyoMaN Kirby Manzon
