ILOILO – Pagadumilian na ang mga sidewalk vendors nga magnegosyo sa mga plaza sa siyudad sang Iloilo subong nga holiday season.
Ginpahayag Iloilo City Public Safety and Transportation Management Office (PSTMO) Head Jeck Conlu nga limitado lang sa mga dalan sang JM Basa, Iznart, Delgado, Valeria, Super market kag Porsyon sang pila ka mga distrito sa siyudad ang pagbaligya sang mga side walk vendors.
Magluwas diri, ginpahayag ni Conlu nga limitado man sa mga prutas, RTW, borloloy kag iban pa nga produkto ang mahimo mabaligya sa mga sidewalk kag indi na kalakip ang mga palupok kag iban nga ginabaliya sa wet market.
Mahimo makakuha sang special business permit sa syudad kag permit sa barangay ang mga negsoyante nga magabaligya sa sidewalks sang syudad.
Ang special business permit mahimo makuha sa balor nga 200 pesos kag mangin balido lamang tubtob sa Disyembre 31.
Magadepende naman sa kada barangay ang balor sang pagabayaran nga barangay permit.
Nahibaluan nga base sa inisyal nga lista sang city government, kapin sa 165 ka mga vendors ang ginalauman nga magtukod sang ila negosyo sa sidewalks sang siyudad.
