Mibaha ang suporta sa mga Maranaw sa Marawi City, alang ngadto kang retired Army General, nga karon Department of Social Welfare and Development Secretary, Rolando Bautista.
Human kini gi-ayo og balikas ni Erwin Tulfo sa iyang programa sa usa ka estasyon sa radyo, nga iya sa gobyerno, tungod kay wala kini ma-interview sa iyang programa niadtong higayon nga bu-ot unta kining hinabi-on.
Niadtong tungura, nag-atubang og usa ka ambassador si Bautista sulod sa iyang buhatan, base sa iyang text message ngadto sa mga higalang media nga nangutana kaniya kung unsay nahitabo.
Sa iyang post sa social media, miingon si Zia Alonto Adiong, nga iyang gisuportahan si Bautista base sa performance ug kredibilidad niini, ilabina sa pakigbatok sa mga terorista.
Si Bautista ang over-all nga ground commander panahon sa Marawi siege sa tuig 2017 samtang si Adiong ang tigpamaba sa Provincial Management Crisis Center.
Human sa giyera sa Marawi, gitutokan sa liderato ni Butista, isip Commanding General sa Philippine Army, ang programa alang sa mga kabataan aron malikayan nga ma-recruit sila sa mga teroristang grupo.
Mi-retiro kini niadtong Oktubre sa nakalabay’ng tuig, ug gilayong gibutang ni Presidente Duterte nga kalihim sa DSWD diin nahimong priyoridad ang mga bakwit sa Marawi.
Sa iyang panahon nakadawat og tag 73 mil pesos ang mga internally displaced families nga gilangkuban sa 53 mil pesos alang sa Transitory Family Support Package ug 20 mil pesos alang sa Livelihood Settlement Grants.
Gawas pa kini sa 1,359 pesos nga Pabaon Relief Packs.
Gihimo usab si Bautista og adopted son sa Sultanatd of Shakba sa Lawasig sa Marawi City.
Miingon si Adiong nga ilang depensahan si Bautista batok ni bisan kinsa nga mohimo og dautan ngadto kaniya. (Divina Suson)
