Liwat nga paga-arestuhon sang kapulisan ang mga lider sang New Peoples Army diri sa isla sang Panay.
Ini kasunod sang direktiba ni Presidente Rodrigo Duterte nga arestuhon ang mga matag-as nga lider sang New Peoples Army matapos gin-kanselar sang gobyerno ang peace talks sa rebelde nga grupo.
Angut sini, ginahulat na lamang sang Police Regional Office 6 ang court order agud arestuhon ang mga lideres sang NPA sa rehiyon lakip na si Concha Araneta Bocala.
Suno kay PNP Regional director Chief Supt. Cesar Hawthorne Binag nga magasunod sila sa mandu sang ila commander in chief.
Madumduman nga ginhatagan sang oportunidad ni pangulong Duterte nga hilwayon ang mga lider sang NPA agud makigbahin sa peace talks apang bangud sa sunod-sunod nga pag-atake sang mga rebelde nga komunista, nagdesisyon ang Presidente nga untatan ang hinun-anon pangkalinungan kag gintawag nga mga terorista nga grupo ang NPA.
