Mga N-G-O sa Marawi padayong naningkamot aron malikay sa recruitment sa ISIS ang mga kabataang IDPs

33

Halos tulo ka tuig human ang lima ka bulan nga giyera sa Marawi City batok sa grupong ISIS Dawlah Islamiya, mitabang na sa gobyerno ang mga non-government organizations nga malikay sa recruitment ang mga kabataan.

Kini pinaagi sa paglakip, ilabina sa mga out-of-school, sa mga cash-for-work program nga dili lamang makapuno sa ilang panahon sa pagtambay, apan makahatag usab kanila og higayon nga makatabang sa panginabuhian sa pamilya.


Ang Implement Project Philippines nga gisupurtahan sa kagamhanang lokal sa Marawi nagtabang sa mga anak sa mga pamilya nga nahiklin human maguba ug masunog ang ilang mga balay tungod sa airstrike panahon sa giyera.

Miingon si Azri Magomnang, Lanao Team Leader sa Implement Project Philippines, mas delikado sa recruitment ang mga anak sa IDPs tungod kay, gawas sa paghaylo kanila og salapi nga ilang gikinahanglan sa pamilya, kuhaon usab sa mga militanteng grupo ang emosyon.

Dili malikayan nga daghan pa sa mga kabataang IDPs ang anaa ang kaguol ug kasuko tungod sa nahitabo sa ilang kinabuhi ug pagkawala sa ilang mga kabtangan samtang ang uban usab kanila namatyan og mga sakop sa pamilya ug mga kabanay.

Sa intervention sa Implement Project, gigastuhan nila aron ipa-ilawom sa skills training sa TESDA ang mga OSY nga nagpangidaron og 18 anyos pa-ubos ug gipangitaan og ma-trabaho-an human sa ilang graduation.

Pananglitan, ang mga OSY nga silang Musanif, 16 anyos ug Asnawi, 18, nahimong suki sa mga residente sa lungsod sa Piagapo, Lanao del Sur nga kung adunay mangita’g panday o kaha katabang sa panday, sila ang pangitaon aron makatrabaho.

Miingon si Asnawi nga dakung tabang sa ilang pamilya ang maong programa sanglit wala naman siyay amahan ug siya nalang ang timbang sa iyang inahan nga mabuhi ang iyang upat ka mga igsoon.

Facebook Comments